ನೆನಪುಗಳ ಬುತ್ತಿ | ಗಜಲ್ | ವೆಂಕಟೇಶ ಚಾಗಿ | nenapugala butti | gajal

**ಗಜಲ್**

ನಿನ್ನೊಡನೆ ಕಳೆದ ನೆನಪುಗಳ ಬುತ್ತಿ ಬಿಚ್ಚಿ ಮೆಲುಕು ಹಾಕುತಿರುವೆ ಸಖಿ

ನನಸಾಗದೇ ಉಳಿದ ಕನಸುಗಳ ಸವಿಯ ಮೆಲುಕು ಹಾಕುತಿರುವೆ ಸಖಿ

ಕರಗಿ ಹೋದ ಸಮಯ ಶೇಷವನ್ನೇನೋ ಉಳಿಸಿ ಹೋಗಿದೆ

ಅಳಿದುಳಿದ ಹೆಜ್ಜೆ ಗುರುತುಗಳ ಹೊಳಪ ಮೆಲುಕು ಹಾಕುತಿರುವೆ ಸಖಿ

ನಾವಾಡಿದ ಮಾತುಗಳು ಗಾಳಿಯಲಿ ಕರಗದೆ ಮತ್ತೆ ರಿಂಗಣಿಸಿವೆ

ಮುತ್ತು ತಂದ ಆ ಮಾತುಗಳ ಘಮವನು ಮೆಲುಕು ಹಾಕುತಿರುವೆ ಸಖಿ

ಮೇಘ ನುಡಿದ ರಾಗ ಅಂದಿನಂತೆ ಈಗಲೂ ಹಸಿರಾಗಿ ಕೇಳುತಿದೆ

ನಿನ್ನ ಹೃದಯ ಬಡಿತದ ತಾಳಕ್ಕೆ ನನ್ನುಸಿರ ರಾಗವನು ಮೆಲುಕು ಹಾಕುತಿರುವೆ ಸಖಿ

ವೆಂಕು ಎಂದು ಕರೆದ ನಿನ್ನ ಧ್ವನಿಗೆ ಈಗಲೂ ಹೂಗಳು ಅರಳುತಿವೆ

ನೀನು ನೀಡಿದ ಪ್ರೀತಿ ಅಮೃತದ ರುಚಿಯ ಮೆಲುಕು ಹಾಕುತಿರುವೆ ಸಖಿ

=> ವೆಂಕಟೇಶ ಚಾಗಿ

ಮತ್ತಷ್ಟು ಓದಿ

ಗಜಲ್